از:عطاء الرحمن نوری (ریسرچ اسکالر)

             اس دنیا میں ان لوگوں کے لیے کچھ بھی ناممکن نہیں ہے جو کچھ کرنا چاہتے ہیں، اگر انسان کے ارادے مضبوط ہو تو غریبی اور مشکل حالات بھی کامیابی کا راستہ نہیں روک سکتے۔ کچھ لوگ ایسے ہوتے ہیں جواپنے خوابوں کی تکمیل کے لیے کچھ نہ کچھ راستہ ڈھونڈنکالتے ہیں۔انصار شیخ کا شمارایسے ہی محنت کش ، مستقل مزاج اور حوصلوں کو پروان چڑھانے والے کامیاب اور آئیڈیل اشخاص میں ہوتا ہیں۔انصار شیخ جب سول سروسز امتحان کی تیاری کے لیے 2012ء میں پوناآئے تو انھیں بہت زیادہ مشکلات کا سامنا کرنا پڑا ،خاص طور پر سماجی امتیازی سلوک کا۔پوسٹ گریجویشن کرتے ہوئے برادران وطن دوستوں کے لیے روم اور میز کاانتظام تو ہو جاتا تھا مگر بحیثیت مسلم انصار شیخ کو کئی جگہ سماجی بائیکاٹ کا سامنا کرنا پڑا۔ان تکلیفوں سے بچنے کے لیے بحالت مجبوری انصار شیخ نے اپنا فرضی نام ’’شبھم ‘‘رکھ لیا۔اس کامیابی کے بعد انصار شیخ کا کہنا ہے کہ’’ اب مجھے اپنے حقیقی نام چھپانا نہیں پڑے گا۔‘‘انصار شیخ کی کہانی جرأت ،جواں مردی، عزم اور حوصلے کے بارے میں ہے،اسی کے ساتھ یہ داستان اقلیتوں کی جانب سماج کے تعصبی ذہنیت کی طرف بھی روشنی ڈالتی ہے۔